बेळगाव: ठिळकवाडी पोलिसांनी शहरामध्ये चेन स्नॅचिंग व सोन्याच्या दागिन्यांच्या चोरीमध्ये सामील असलेल्या अंतरराज्य टोळीचा पर्दाफाश करत दोन दरोडेखोरांना बेड्या ठोकण्यात यश मिळवले आहे. या कारवाईत पोलिसांनी 10 लाख 25 हजार रुपयांचा मुद्देमाल जप्त केला आहे.
अटक करण्यात आलेल्या संशयितांची नावे नागराज बसप्पा हरणिशिकारी (19) आणि मन्नू दिपक राऊत (22) अशी आहेत. ठिळकवाडी पोलीस ठाण्यात नोंद झालेल्या चोरीच्या प्रकरणाचा तपास सुरू असताना पोलिसांनी या दोघांना ताब्यात घेतले. चौकशीदरम्यान त्यांनी शहरातील विविध ठिकाणी सोन्याचे दागिने लांबविल्याची कबुली दिली.
कारवाईदरम्यान पोलिसांनी 80.36 ग्रॅम सोन्याचे दागिने (मूल्य अंदाजे ₹9,15,000), ₹50,000 किमतीची मोटारसायकल, तसेच ₹60,000 किंमतीची दुसरी मोटारसायकल असा एकूण ₹10,25,000 किंमतीचा मुद्देमाल जप्त केला आहे.
ही यशस्वी कारवाई ठिळकवाडी पोलीस निरीक्षक परशुराम पूजारी यांच्या मार्गदर्शनाखाली पीएसआय विश्वनाथ घंटामठ, प्रभाकर डोळी, तसेच कर्मचारी महेश पाटील, एस.एम. करलिंगण्णवर, लाडजीसाब मुल्तानी, नागेंद्र तळवार आणि सतीश गिरीरवर यांच्या पथकाने केली.
तपासात आणखीही प्रकरणे उघड होण्याची शक्यता असल्याचे पोलिसांनी सांगितले असून पुढील तपास सुरू आहे.
