बेळगाव – “गुणवत्तापूर्ण आणि आधुनिक तंत्रज्ञानाधारित शिक्षण आत्मसात करून विद्यार्थी केवळ नोकरी शोधण्यात मर्यादित राहू नयेत; उलट उद्योग निर्माण करून इतरांना रोजगार देत राष्ट्रनिर्माणात योगदान द्यावे,” असे आवाहन राज्यपाल थावरचंद गहलोत यांनी केले.
बेळगावातील सुवर्ण विधानसौध येथे राणी चन्नम्मा विद्यापीठाचा १४ वा वार्षिक दीक्षांत समारंभ अत्यंत उत्साहपूर्ण वातावरणात पार पडला. पदवी आणि पदव्युत्तर परीक्षेत यशस्वी ठरलेल्या विद्यापीठातील विद्यार्थ्यांना पदवी प्रदान करण्यात आली.
कार्यक्रमात बोलताना राज्यपाल गहलोत यांनी विद्यापीठाच्या कार्यपद्धतीचे कौतुक करत सांगितले की, “पदव्युत्तर परीक्षेचा निकाल जाहीर झाल्यानंतर केवळ ५० दिवसांत दीक्षांत समारंभ आयोजित करणे आणि १८ महिन्यांत तीन दीक्षांत समारंभ पार पाडणे हा उल्लेखनीय विक्रम आहे.”
बेळगाव जिल्ह्यातील ख्यातनाम समाजसेवक, ‘बेळगावचे अण्णा हजारे’ म्हणून ओळखले जाणारे शिवाजीराव छत्रू कागणीकर यांना या समारंभात मानद डॉक्टरेट पदवी प्रदान करण्यात आली. हा सन्मान स्वीकारताना त्यांनी देशातील गंभीर सामाजिक वास्तव मांडताना सांगितले,
“स्वातंत्र्याला ७६ वर्षे झाली तरी राष्ट्रातील समस्यांचे निराकरण झालेले नाही. शेतकऱ्यांना आत्महत्येच्या उंबरठ्यावर आणणाऱ्या परिस्थितीचे अस्तित्व हे अत्यंत दुर्दैवी आहे.”
यांच्यासह विनोद दोड्डण्णवर (शिक्षण/समाजसेवा) आणि बसवराज येलीगार (साहित्य/समाजसेवा) यांनाही मानद डॉक्टरेट बहाल करण्यात आली.
🎓 यंदाचे शैक्षणिक यश
▪ एकूण पात्र विद्यार्थी — ३८,४१५
▪ रँक मिळवले — १२५ विद्यार्थी
▪ सुवर्णपदके — ३९
▪ पीएच.डी. पदवी प्राप्त — २८ संशोधक
कार्यक्रमाला राज्याचे उच्च शिक्षण मंत्री डॉ. एम.सी. सुधाकर, तसेच इस्रोचे माजी अध्यक्ष पद्मश्री ए.एस. किरणकुमार यांची उपस्थिती लाभली. कुलगुरू प्रा. सी.एम. त्यागराज, विद्यापीठाचे सर्व प्रमुख अधिकारी, प्राध्यापक आणि विद्यार्थी मोठ्या संख्येने उपस्थित होते.
