लोकसभा अचारसंहितेच्या उल्लंघन प्रकरणी समिती नेत्यांना जामीन
बेळगाव : लोकसभा निवडणूक 2024 दरम्यान महाराष्ट्र एकीकरण समितीचे उमेदवार महादेव पाटील यांचा उमेदवारी अर्ज दाखल करताना धर्मवीर संभाजी महाराज चौक परिसरातून काढण्यात आलेल्या मिरवणुकीवरून दाखल झालेल्या प्रकरणात संबंधित नेत्यांना जामीन मंजूर झाला आहे.मिरवणुकीत अपेक्षेपेक्षा अधिक लोकांची गर्दी जमविण्यात आली होती तसेच बैलगाड्यांचा परवानगीशिवाय वापर करण्यात आल्याचा ठपका ठेवत कॅम्प पोलिस ठाण्यात गुन्हा नोंदवण्यात आला होता. या गुन्ह्यात महादेव पाटील यांच्यासह शुभम शेळके, मनोहर किणेकर, प्रकाश मरगाळे, रेणू किल्लेकर व सरिता पाटील यांचा समावेश होता.29 सप्टेंबर रोजी पाचव्या अतिरिक्त दिवाणी न्यायालयात या प्रकरणाची सुनावणी होऊन सर्वांना 20 हजारांच्या जातमुचलक्यावर तितक्याच रकमेच्या जामिनासह, पुन्हा असा प्रकार न घडविण्याच्या अटीवर न्यायालयाने सशर्त जामीन मंजूर केला.या खटल्यात समिती नेत्यांचे कायदेशीर कामकाज वकील महेश बिर्जे, बाळासाहेब कागणकर, रिचमन रिकी व वैभव कुट्रे यांनी पाहिले. सुनावणीच्या वेळी मालोजी अष्टेकर, धनंजय पाटील, मनोहर हुंदरे, प्रकाश गडकरी आदी कार्यकर्ते उपस्थित होते.
