बेळगांव:सोने व्यवहाराच्या बहाण्याने बेळगावच्या सराफ व्यावसायिकाला कऱ्हाड येथे बोलावून तब्बल ३५ लाख रुपयांची लूट केल्याची घटना उघडकीस आली आहे. १३ ऑगस्ट रोजी घडलेली ही घटना पोलिस तपासानंतर प्रकाशात आली असून, दोन संशयितांना अटक करण्यात आली आहे, तर एक आरोपी फरार आहे.
मिळालेल्या माहितीनुसार, प्रवीण प्रभाकर आनवेकर (वय ४७, रा. शहापूर, बेळगाव) हे सराफ व्यवसाय करत असून, त्यांची ओळख साईराज या व्यक्तीशी झाली होती. साईराजने आनवेकर यांना कऱ्हाड येथील मुरलीधर उर्फ अनिकेत शेवाळे याची ओळख करून दिली. शेवाळे याने कमी दरात सोने विक्री करण्याचे आमिष दाखवून त्यांना व्यवहारासाठी कऱ्हाड येथे बोलावले.
१३ ऑगस्ट रोजी आनवेकर ३५ लाख रुपयांची रोकड घेऊन कऱ्हाडला आले. संशयितांनी त्यांना मंगळवार पेठेतील एका पडक्या वाड्यात नेले, तेथे त्यांच्यावर लाथाबुक्क्यांनी मारहाण करून रोकड असलेली बॅग हिसकावून पसार झाले.
या घटनेनंतर आनवेकर यांनी पोलिसात फिर्याद दिली. पोलिसांनी त्वरीत कारवाई करत मुरलीधर ऊर्फ अनिकेत शेवाळे (रा. कऱ्हाड) आणि कोल्हापूर येथील एका साथीदाराला अटक केली असून, आणखी एक आरोपी फरार आहे.
पोलिस तपासात प्राथमिक चौकशीतून असे स्पष्ट झाले आहे की, आरोपींनी आधीपासूनच हा लूटप्रकरणाचा डाव आखला होता. पुढील तपास कऱ्हाड पोलिसांकडून सुरू आहे.
