बेळगाव : खून खटल्याच्या सुनावणीदरम्यान वार्तांकनासाठी उपस्थित असलेल्या पत्रकारांवर न्यायालय परिसरातच हल्ला झाल्याची धक्कादायक घटना बुधवारी सायंकाळी उघडकीस आली. या प्रकरणी पोलिसांनी तातडीने कारवाई करत चार जणांविरोधात गुन्हा दाखल केला आहे.
शहबाज पठाण खून प्रकरणात न्यायालय निकाल सुनावणार असल्याने अनेक पत्रकार आणि कॅमेरामन न्यायालय परिसरात जमले होते. दरम्यान, आरोपींना पोलीस न्यायालयातून बाहेर आणत असताना त्यांच्या चित्रीकरणाचे काम सुरू होते. त्याच वेळी रौडीशीटर लक्ष्मण दड्डी आणि त्याच्या साथीदारांनी अचानक पत्रकारांकडे धाव घेत हल्ला चढवला.
या हल्ल्यात पत्रकारांना धमकावण्यात आले तसेच अर्वाच्य भाषेत शिवीगाळ करण्यात आल्याचे समोर आले आहे. विशेष म्हणजे ही घटना पोलिसांच्या उपस्थितीत घडल्याने काही काळ गोंधळाचे वातावरण निर्माण झाले होते. परिस्थिती हाताबाहेर जाण्याआधी पोलिसांनी तत्परता दाखवत आरोपींना तातडीने पोलीस वाहनात बसवले.
घटनेनंतर न्यायालय परिसरात मोठी खळबळ उडाली असून सोशल मीडियावरही या प्रकरणाचे तीव्र पडसाद उमटले. पत्रकारांवर झालेल्या या हल्ल्याची गंभीर दखल घेत मार्केट पोलीस ठाण्यात रौडीशीटर लक्ष्मण दड्डी, सवीन दड्डी, बसवराज दड्डी आणि बसवण्णी नाईक यांच्याविरोधात गुन्हा नोंदवण्यात आला आहे.
