जातनिहाय जनगणना : दुर्गामाता महिला मंडळांतून जनजागृतीची नवी चळवळ
बेळगाव / प्रतिनिधी
कर्नाटकात २२ सप्टेंबरपासून सुरू झालेल्या जातनिहाय जनगणनेबाबत मराठा समाजात जनजागृतीचे सशक्त वातावरण तयार होत आहे. या मोहिमेत महिलांचा सहभाग वाढावा यासाठी समाजसेविका माधुरी जाधव पाटील यांनी पुढाकार घेतला आहे.
शहर व उपनगरातील विविध श्री दुर्गामाता महिला मंडळांना भेट देत त्यांनी महिलांना जनगणना प्रक्रियेचे महत्त्व समजावून सांगितले. फॉर्म भरताना धर्म – हिंदू, जात – मराठा, उपजात – कुणबी आणि मातृभाषा – मराठी अशी नोंद कशी करावी, तसेच चुका होऊ नयेत यासाठी कोणत्या बाबींवर लक्ष द्यावे, याचे मार्गदर्शन त्यांनी केले.
या प्रसंगी कनका कोकणकर, अश्विनी लाड, प्रियंका जाधव, संजना सातेरी, सुचित्रा सुतार, धनश्री कोरगावकर, रेखा धामणेकर, सुमित्रा कणबर्गी, अश्विनी बेडरे, गंगा पाटील व चंद्रकला परब आदी कार्यकर्त्या उपस्थित होत्या.
माधुरी पाटील यांच्या या उपक्रमामुळे महिलांमध्ये जागरूकता निर्माण होत असून समाजात एकसंघतेचा संदेश पोहोचत आहे.
