बेळगावात दलित संघर्ष समितीचा संताप, प्रतीकात्मक अंत्ययात्रेतून कठोर शिक्षेची मागणी!
बेळगाव, :
सर्वोच्च न्यायालयाचे सरन्यायाधीश न्यायमूर्ती बी.आर. गवई यांच्यावर बूटफेक करण्याचा प्रयत्न करणाऱ्या वकिलाविरुद्ध देशभरातून संतापाची लाट उसळली आहे. या घटनेचा तीव्र निषेध व्यक्त करत दलित संघर्ष समिती (आंबेडकरवाद) बेळगावात आक्रमक झाली आहे. समितीने शहरात प्रतिकात्मक अंत्ययात्रा काढत शासनाचे लक्ष वेधले.
राणी चन्नम्मा चौकातून ही अंत्ययात्रा निघाली. यावेळी कार्यकर्त्यांनी राकेश किशोरचा प्रतिकात्मक मृतदेह घेऊन घोषणा दिल्या. घटनास्थळी कार्यकर्त्यांनी प्रतिकात्मक मृतदेहाचे दहन करण्याचा प्रयत्न केला, मात्र पोलिसांनी तातडीने हस्तक्षेप करत परिस्थिती नियंत्रणात आणली.
https://youtube.com/shorts/2OCP_uDai1E?si=AWYIoa7-XM_4sRyL
दलित संघर्ष समितीचे जिल्हाध्यक्ष महांतेश तळवार यांनी या घटनेचा तीव्र शब्दांत निषेध केला. ते म्हणाले, “संविधानाने सर्व नागरिकांना समान हक्क दिले आहेत. न्यायव्यवस्थेच्या सर्वोच्च पदावर असलेल्या न्यायमूर्तींवर अशा प्रकारे हल्ला करणे म्हणजे लोकशाहीला गालबोट लावणारा प्रकार आहे. दोषी राकेश किशोरवर कठोरात कठोर कारवाई व्हावी.”
समितीच्या नेत्या शशी साळवे यांनीही आक्रमक भाषण करत सांगितले, “डॉ. बाबासाहेब आंबेडकरांनी देशाला दिलेले संविधान हे प्रत्येक भारतीयाचे संरक्षण करणारे आहे. त्याचा अपमान करणाऱ्यांना कठोर शिक्षा झालीच पाहिजे. हा प्रकार केवळ एका व्यक्तीचा नाही, तर संपूर्ण न्यायव्यवस्थेवरील हल्ला आहे.”
दरम्यान, आंदोलनात जिल्हाध्यक्ष महांतेश तळवार, राज्य खजिनदार सिद्धप्पा कांबळे, तसेच दीपक दबाडे, सागर कांबळे, फकीर तळवार, आनंद कोलकर, नागेश कामशेट्टी यांच्यासह मोठ्या संख्येने दलित बांधव सहभागी झाले होते.
महांतेश तळवार म्हणाले, “देशभरात दलित समाजावर होत असलेल्या अन्यायाविरुद्ध आता आम्ही मौन बाळगणार नाही. शासनाने अशा घटना रोखण्यासाठी ठोस पावले उचलली नाहीत, तर आम्ही रस्त्यावर उतरून संघर्ष करू.”
