बेळगाव येथील Belagavi Institute of Medical Sciences (बिम्स) रुग्णालयात कर्तव्यावर असलेल्या एका परिचारकावर झालेल्या हल्ल्यामुळे वैद्यकीय वर्तुळात संतापाची लाट उसळली आहे. या घटनेच्या निषेधार्थ नर्सिंग कर्मचाऱ्यांनी आज मुख्य प्रवेशद्वारासमोर ठिय्या आंदोलन करत सुरक्षेची ठोस हमी देण्याची मागणी केली.
मिळालेल्या माहितीनुसार, सुपर स्पेशालिटी वॉर्डमध्ये पाणी आणण्याच्या किरकोळ कारणावरून एका मानसिक रुग्ण तरुणीने गोंधळ घालत परिचारक बसवराज कबाडगी यांच्या हाताला चावा घेतला. या प्रकारानंतर संबंधित तरुणीच्या नातेवाईकांनी अफवेच्या आधारे जमाव जमवून कबाडगी यांच्यावर हल्ला केला. या मारहाणीत ते गंभीर जखमी झाले असून त्यांच्यावर उपचार सुरू आहेत.
घटनेनंतर संतप्त नर्सिंग स्टाफने रुग्णालय प्रशासनाविरोधात तीव्र भूमिका घेतली. सुमारे साडेतीनशेहून अधिक कर्मचारी जीव धोक्यात घालून सेवा देत असताना अशा प्रकारच्या घटना वाढत असल्याची खंत व्यक्त करण्यात आली. सुरक्षा व्यवस्था अपुरी असल्यास काम करणे कठीण होईल, अशी भावना कर्मचाऱ्यांच्या वतीने खादीर मुजावर यांनी व्यक्त केली.
दरम्यान, परिस्थितीचे गांभीर्य लक्षात घेऊन रुग्णालयाचे संचालक Ashok Kumar Shetty यांनी आंदोलकांशी संवाद साधला. तरुणीकडून गैरवर्तन झाले असल्याचे आणि त्यानंतर नातेवाईकांनी चुकीच्या समजुतीतून हल्ला केल्याचे त्यांनी स्पष्ट केले.
या प्रकरणी APMC Police Station Belagavi यांनी गुन्हा नोंदवून तपास सुरू केला आहे. तसेच कर्मचाऱ्यांच्या सुरक्षेसाठी पोलीस आयुक्तांकडे विशेष विनंती केल्याचेही संचालकांनी सांगितले.
आरोपींवर कठोर कारवाई करण्याचे लेखी आश्वासन प्रशासनाकडून मिळाल्यानंतर कर्मचाऱ्यांनी आपले काम पुन्हा सुरू केले. मात्र दोषींना अटक न झाल्यास आंदोलन तीव्र करण्याचा इशारा देण्यात आला आहे.
