बेळगाव : शहरातील अवैध मटका व्यवसाय आणि अमली पदार्थ सेवनाविरोधात बेळगाव पोलिसांनी कारवाईचा धडाका कायम ठेवला आहे. विविध पोलीस ठाण्यांच्या पथकांनी केलेल्या स्वतंत्र कारवाईत एका मटका चालकाला पकडण्यात आले असून, तिघांविरोधात गांजा सेवन केल्याप्रकरणी गुन्हे दाखल करण्यात आले आहेत.
बेळगाव ग्रामीण पोलिसांनी केलेल्या कारवाईत मच्छे परिसरातील केएसआरपी बटालियनजवळ सार्वजनिक ठिकाणी मटका खेळ सुरू असल्याची माहिती मिळाल्यानंतर छापा टाकण्यात आला. यावेळी संशयित नवीन हणमंत कडककोळ (वय 30, रा. कपिलेश्वर परिसर, बेळगाव) याला ताब्यात घेण्यात आले.
पोलिसांनी त्याच्याकडून रोख रक्कम आणि मटका खेळाशी संबंधित साहित्य जप्त केले आहे. या प्रकरणी बेळगाव ग्रामीण पोलीस ठाण्यात कर्नाटक पोलीस कायद्यानुसार गुन्हा दाखल करून पुढील तपास सुरू आहे.
दरम्यान, मार्केट पोलिसांनी गांजा सेवन करणाऱ्या एका तरुणावर कारवाई केली. रामलिंगखिंड गल्ली परिसरातील समर्थ भगवान नवले (वय 21) हा सार्वजनिक ठिकाणी संशयास्पद हालचाली करताना आढळून आला. वैद्यकीय तपासणीत अमली पदार्थ सेवन केल्याचे स्पष्ट झाल्यानंतर त्याच्यावर एनडीपीएस कायद्यानुसार गुन्हा दाखल करण्यात आला.
याशिवाय शाहापूर पोलिसांनी भारतनगर, खासबाग परिसरात कारवाई करत दोन तरुणांवर गुन्हा दाखल केला. शंकर मारुती गोळार (वय 26) आणि सदाशिव गौरीश पुजारी (वय 26) यांची वैद्यकीय तपासणी केल्यानंतर गांजा सेवन केल्याचे निष्पन्न झाले.
बेळगाव शहर पोलिसांनी अवैध धंदे आणि अमली पदार्थांविरोधात सुरू केलेल्या या मोहिमेचे पोलीस आयुक्त आणि वरिष्ठ अधिकाऱ्यांनी कौतुक केले आहे.
