बेल्लारी : काँग्रेस सरकारच्या कथित भ्रष्टाचार, जनविरोधी धोरणे आणि कारभाराविरोधात भाजपने सुरू केलेल्या ‘बल्लारी चलो’ पदयात्रेला कार्यकर्त्यांचा उत्स्फूर्त प्रतिसाद मिळत आहे. कुडितिनी येथून बेल्लारीपर्यंत काढण्यात आलेल्या पदयात्रेत भाजपचे प्रदेशाध्यक्ष विजयेंद्र येडियुरप्पा यांच्यासह पक्षातील अनेक वरिष्ठ नेते, पदाधिकारी आणि कार्यकर्ते सहभागी झाले.
पदयात्रेदरम्यान काँग्रेस सरकारच्या कारभाराविरोधात घोषणाबाजी करण्यात आली. सरकारच्या धोरणांबाबत जनतेमध्ये असलेल्या नाराजीचा आवाज या आंदोलनातून बुलंद करण्याचा प्रयत्न भाजपकडून करण्यात आला.
या पदयात्रेत सी. टी. रवी, सी. सी. पाटील, एम. पी. रेणुकाचार्य, श्रीकांत कुलकर्णी, हरीश पूंजा, बी. श्रीरामुलू, किशोर कुमार पुत्तूर, सुभाष पाटील यांच्यासह अनेक प्रमुख नेते, कार्यकर्ते आणि पदाधिकारी सहभागी झाले.
जनतेचा प्रतिसाद ठरला चर्चेचा विषय
कुडितिनी ते बल्लारी या मार्गावर पदयात्रेला नागरिकांकडून मिळालेल्या प्रतिसादाचा भाजप नेत्यांनी उल्लेख केला. विविध ठिकाणी नागरिकांनी पदयात्रेचे स्वागत करून सहभागी नेत्यांना आणि कार्यकर्त्यांना पाठिंबा दिल्याचा दावा करण्यात आला.
जनतेचा हा प्रतिसाद पक्षाच्या कार्यकर्त्यांमध्ये नवी ऊर्जा निर्माण करणारा असल्याचे भाजपकडून सांगण्यात आले. काँग्रेस सरकारच्या कारभाराविरोधातील जनभावना अधिक व्यापक करण्यासाठी आंदोलन पुढे नेण्याचा निर्धारही यावेळी व्यक्त करण्यात आला.
दरम्यान, ‘जनतेमध्ये जागृती निर्माण करून कर्नाटकला काँग्रेसमुक्त करण्यासाठी संघर्ष सुरूच ठेवू’, असा संदेश भाजप नेत्यांनी दिला.
