बेळगांव:आखाती देशातून भारतात सोन्या प्रमाणे पेट्रोल, डिझेलचे स्मगलिंग करणाऱ्या रॅकेटचा पर्दाफाश बेळगाव पोलिसांनी केला आहे. केंद्र आणि राज्य सरकारचा कोट्यावधीचा कर चुकवून मुंबईहून बंगलोर आणि अन्य ठिकाणी टँकर मधून पेट्रोल, डिझेलची अर्ध्या किंमतीला विक्री करण्यात येत असल्याचे उघड झाले आहे.
बेळगाव मधील माळमारुती पोलीसांनी डिझेलची वाहतूक करणारा एक टँकर अडवून तपासणी केली असता ट्रक चालकाकडे संबंधित कोणतीही कागदपत्रे नसल्याचे उघडकीस आले. टँकर चालकाची पोलीस स्थानकात कसून चौकशी केल्यावर पेट्रोल, डिझेलच्या स्मगलिंगचे रॅकेट उघडकीस आले. टँकरची नोंदणी गुजरातची असून त्याचा मालक कर्नाटकातील गुजरातचा आहे. पोलिसांनी टँकर मालकाला ताब्यात घेतले आहे.
टँकर मधून सतरा हजार लिटर डिझेल मुंबईहून बंगलोरला नेण्यात येत होते.या रॅकेट मध्ये राजस्थान आणि मुंबईतील व्यक्ती सहभागी आहेत.माळ मारुती पोलीस स्थानकाचे पोलीस निरीक्षक बी. आर. गड्डेकर आणि त्यांच्या सहकाऱ्यांनी ही कारवाई केली.
आखाती देशातून जहाजातून पेट्रोल, डिझेल मुंबईला आणले जात होते आणि तेथून त्याचा पुरवठा टँकरद्वारे विविध राज्यातील पेट्रोल पंपाना केला जात होता अशी माहिती प्राथमिक तपासात मिळाली आहे. खासगी जहाजातून मुंबईला पेट्रोल, डिझेल आणून नंतर टँकरद्वारे त्याचा टँकरद्वारे पुरवठा केला जात होता. या रॅकेटमध्ये तेल उत्पादक, जहाज मालक देखील सहभागी असण्याची शक्यता व्यक्त केली जात आहे.या रॅकेटची पाळेमुळे खणण्याचा nischay निश्चय पोलिसांनी केला आहे. बेळगाव पोलिसांची दोन पथके मुंबई आणि राजस्थान येथे तपासासाठी जाणार आहेत.
