महानगरपालिकेत महिला क्रिकेट विश्वविजयाचा उत्साह
बेळगांव:भारतीय महिला क्रिकेट संघाच्या ऐतिहासिक विश्वविजयानिमित्त बेळगांव महानगरपालिकेच्या वतीने शहरात अनोख्या पद्धतीने विजयोत्सव साजरा करण्यात आला. या सोहळ्याचे वैशिष्ट्य म्हणजे — बेळगांवातील बालकांच्या क्रिकेट संघाने महापालिकेत केक कापून महिला संघाच्या विजयाचा आनंद साजरा केला.
या कार्यक्रमाला महापौर मंगेश पवार, उपमहापौर सौ. वाणि जोशी,आयुक्त सौ. बी. शुभा,पक्षनेते श्री. हणमंत कोंगाळी, विरोधी पक्षनेते सोहेल संगोळी तसेच नगरसेवक, अधिकारी आणि कर्मचारी उपस्थित होते.
महापौर मंगेश पवार यांनी या प्रसंगी बोलताना सांगितले, “भारतीय महिला क्रिकेटपटूंनी संपूर्ण देशाचा अभिमान उंचावला आहे. त्यांच्या संघर्ष, आत्मविश्वास आणि मेहनतीतून आजच्या पिढीतील प्रत्येक मुलीला प्रेरणा मिळेल,” असे ते म्हणाले.
उपमहापौर वाणि जोशी यांनीही महिला शक्तीच्या या कामगिरीचे कौतुक करत, क्रीडा क्षेत्रात अधिकाधिक महिलांनी सहभाग घ्यावा, असे आवाहन केले.
कार्यक्रमाच्या शेवटी उपस्थित सर्वांनी भारतीय महिला संघाच्या यशासाठी आणि देशाच्या क्रीडा गौरवासाठी शुभेच्छा दिल्या.
महापालिकेच्या या उपक्रमाचे शहरवासीयांकडून कौतुक होत असून, “महिलांचा विजय म्हणजे राष्ट्राचा अभिमान” असा संदेश या सोहळ्याद्वारे देण्यात आला.
