बेळगावच्या टिळकवाडी परिसरातील क्लासिक मॅनोर अपार्टमेंटमध्ये राहणाऱ्या एका डॉक्टर दाम्पत्याने शेजारी राहणाऱ्या काही व्यक्तींविरोधात गंभीर आरोप करत पोलिसांकडे धाव घेतली आहे. विनाकारण त्रास देणे, शिवीगाळ करणे, तसेच जीवे मारण्याच्या धमक्या देत बदनामी करण्याचा प्रयत्न होत असल्याची तक्रार करण्यात आली आहे.
डॉ. रुपेश साळुंखे आणि डॉ. संध्या नेर्लेकर हे या अपार्टमेंटमध्ये राहत असून तळमजल्यावर त्यांनी मल्टी स्पेशालिटी आयुर्वेदिक उपचार केंद्र सुरू केले आहे. त्याच इमारतीत राहणाऱ्या काही जणांकडून सातत्याने मानसिक त्रास दिला जात असल्याचे त्यांनी सांगितले.
डॉ. साळुंखे यांनी पत्रकार परिषदेत सांगितले की, कोणताही वाद किंवा जुने वैमनस्य नसताना केवळ त्रास देण्याच्या उद्देशाने काही व्यक्ती वारंवार गैरवर्तन करत आहेत. रुग्णांसमोर अपमानास्पद भाषा वापरणे, शिवीगाळ करणे आणि प्रतिष्ठेला धक्का पोहोचवण्याचे प्रकार घडत असल्याचे त्यांनी नमूद केले.
पाणीपुरवठ्याच्या समस्येमुळे टेरेसवर पाहणी करण्यासाठी गेलेल्या डॉ. साळुंखे यांच्यावर काही जणांनी हल्ला केल्याचा आरोप आहे. या घटनेत त्यांच्या हाताला दुखापत झाली असून धारदार वस्तूने वार केल्याची नोंद करण्यात आली आहे.
या सर्व प्रकारांमुळे त्रस्त झालेल्या डॉक्टर दाम्पत्याने पोलीस आयुक्त आणि टिळकवाडी पोलीस स्थानकात अधिकृत तक्रार दाखल केली आहे. या प्रकरणी पुढील तपास सुरू असल्याची माहिती मिळत आहे.
