बेळगाव तालुक्यातील हुंच्यानट्टी गावाजवळ एका २२ वर्षीय तरुणाची धारदार शस्त्रांनी हत्या करण्यात आल्याची धक्कादायक घटना उघडकीस आली आहे. पूर्वीपासून सुरू असलेल्या वादातून हा हल्ला घडल्याचा प्राथमिक अंदाज पोलिसांनी व्यक्त केला असून, या प्रकरणामुळे परिसरात खळबळ उडाली आहे.
मजगाव येथील राहुल तलवार (वय २२) असे मृत तरुणाचे नाव आहे. या प्रकरणी मंजुनाथ शितीमणी आणि त्याच्या ७ ते ८ साथीदारांविरोधात बेळगाव ग्रामीण पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, राहुल याने काही काळापूर्वी एका खाजगी मेडिकल कंपनीत काम केले होते. आरोपींकडून त्याच्यावर संशयास्पद आणि बेकायदेशीर कामांमध्ये सहभागी होण्यासाठी दबाव टाकला जात होता. मात्र राहुलने त्याला विरोध केल्याने दोन्ही बाजूंमध्ये तणाव निर्माण झाला होता.
नातेवाईकांच्या माहितीनुसार, आरोपी मंजुनाथ हा कॉलेजमधील वादांमध्ये मध्यस्थी करून कमिशन घेण्याचे काम करत असे. त्याच्यासोबत राहुलचे कोणतेही मैत्रीपूर्ण संबंध नव्हते. काही आर्थिक व्यवहार पूर्ण करायचे असल्याचे सांगून आरोपींनी राहुलला हुंच्यानट्टी परिसरातील निर्जन जागी बोलावून घेतले.
राहुल घटनास्थळी पोहोचताच दबा धरून बसलेल्या आरोपींनी त्याच्यावर तलवार आणि चाकूसारख्या धारदार शस्त्रांनी हल्ला चढवला. या हल्ल्यात राहुलच्या डोक्याला आणि हाताला गंभीर दुखापत झाली. रक्तबंबाळ अवस्थेत त्याला तातडीने बिम्स रुग्णालयात दाखल करण्यात आले. मात्र उपचारादरम्यान त्याचा मृत्यू झाला.
“पैशांच्या व्यवहाराचा बहाणा करून पूर्वनियोजित कट रचण्यात आला आणि राहुलची फसवणूक करून हत्या करण्यात आली,” असा आरोप मृताच्या नातेवाईकांनी केला आहे.
घटनेची माहिती मिळताच बेळगाव ग्रामीण पोलिसांनी घटनास्थळी भेट देत पंचनामा केला. मुख्य आरोपी मंजुनाथ शितीमणी आणि त्याच्या साथीदारांचा शोध घेण्यासाठी विशेष पथके रवाना करण्यात आली असून पुढील तपास सुरू आहे
