बेळगाव तालुक्यातील खादरवाडी मराठी शाळेने ‘आदर्श शाळा’ पुरस्कार पटकावून शैक्षणिक क्षेत्रात नवा मान मिळवला आहे. या उल्लेखनीय यशानिमित्त शाळेच्या वतीने विशेष गौरव सोहळ्याचे आयोजन करण्यात आले होते.
कार्यक्रमाची सुरुवात महाराष्ट्र एकीकरण समितीचे ज्येष्ठ नेते आर. एम. चौगुले यांच्या हस्ते दीपप्रज्वलन करून करण्यात आली. यावेळी मान्यवरांनी शाळेच्या शैक्षणिक प्रगतीबाबत समाधान व्यक्त करत, ग्रामीण भागात दर्जेदार शिक्षण देणाऱ्या या शाळेचे विशेष कौतुक केले.
कार्यक्रमाच्या प्रारंभी मुख्याध्यापक दळवी यांनी उपस्थित सर्व नेते व मान्यवरांचा परिचय करून दिला. या गौरव सोहळ्यास खादरवाडी मराठी शाळेचे शिक्षणप्रेमी व प्रसिद्ध उद्योजक रमेश पाटील, मनूर ग्रामपंचायत सदस्य साबरेकर, एसडीएमसी अध्यक्ष परसराम गोरल तसेच सामाजिक कार्यकर्ते रमेश माळवी यांची प्रमुख उपस्थिती होती.
याशिवाय उत्तम पाटील, भारत बस्टवाडकर, देवाप्पा कोलेकर, राजू डोळकर, परशुराम पाटील यांच्यासह मोठ्या संख्येने पालक, शिक्षक आणि विद्यार्थी उपस्थित होते. शाळेने मिळवलेल्या या सन्मानामुळे संपूर्ण खादरवाडी गावात आनंदाचे वातावरण निर्माण झाले आहे.
कार्यक्रमाच्या समारोपप्रसंगी बागेवाडी सर यांनी उपस्थितांचे आभार मानले. शाळेच्या यशामध्ये शिक्षकांचे समर्पण आणि पालकांचे सहकार्य अत्यंत मोलाचे असल्याचे त्यांनी आपल्या भाषणात नमूद केले.
