“विकासासाठी पक्षभेद विसरूया” — राज्यसभा खासदार इराण्णा कडाडी यांचे आवाहन; कल्लेहोळ येथे आधुनिक बसस्टँडचे उद्घाटन
बेळगाव (प्रतिनिधी):
बेळगाव तालुक्यातील कल्लेहोळ गावात राज्यसभा खासदार इराण्णा कडाडी यांच्या स्थानिक विकास निधीतून बांधण्यात आलेल्या आधुनिक बसस्टँडचे उद्घाटन मोठ्या उत्साहात पार पडले.
या प्रसंगी बोलताना खासदार कडाडी म्हणाले, “निवडणुकीच्या काळात पक्षाचे राजकारण करावे, पण निवडणुकीनंतर सर्वांनी एकत्र येऊन गावाचा विकास साधावा. विकासासाठी पक्षभेद न ठेवता सर्व समाजघटकांनी हातभार लावावा,” असे ते म्हणाले.
भाजप बेळगाव ग्रामीणचे माजी मंडळ अध्यक्ष धनंजय जाधव यांनी या प्रसंगी सांगितले की, खासदार कडाडी यांनी जिल्ह्यातील 100 बसस्टँडच्या उभारणीला मंजुरी दिली असून गेल्या तीन महिन्यांत 30 बसस्टँडचे उद्घाटन झाले आहे. उर्वरित 35 बसस्टँडचे काम जलद गतीने सुरू असून उर्वरित प्रकल्प लवकरच पूर्ण होतील, असे त्यांनी नमूद केले.
ते पुढे म्हणाले, “इराण्णा कडाडी यांची काम करण्याची पद्धत पंतप्रधान नरेंद्र मोदींसारखीच वेगवान आणि परिणामकारक आहे. भूमिपूजनानंतर काम तात्काळ सुरू करून अल्पावधीत उद्घाटनापर्यंत पोहोचवणे ही त्यांची खासियत आहे,” असे जाधव म्हणाले.
या कार्यक्रमाला बुडाचे माजी अध्यक्ष संजय बेळगावकर, रामचंद्र मन्नोलकर, पवन देसाई, साईनाथ पाटील तसेच सुलगा ग्रामपंचायत सदस्य अनिल पाटील आदी मान्यवर उपस्थित होते.
