शहर परिसरात नंबर प्लेट नसलेल्या तसेच अपूर्ण, झाकलेल्या किंवा नियमबाह्य नंबर प्लेट असलेल्या दुचाकींचा वापर वाढत असल्याच्या पार्श्वभूमीवर बेळगाव पोलिसांनी विशेष तपासणी मोहीम राबवली. या मोहिमेत एकूण 105 दुचाकींवर कारवाई करण्यात आली.
तपासणीदरम्यान नंबर प्लेट नसणे, पुढील किंवा मागील बाजूला नंबर प्लेट न लावणे, नंबर झाकून ठेवणे अथवा नियमबाह्य स्वरूपातील नंबर प्लेट वापरणे अशा विविध प्रकारचे उल्लंघन आढळून आले. संबंधित वाहनांची कागदपत्रे तपासण्यात आली असून नियमभंग करणाऱ्या चालकांवर दंडात्मक कारवाई करण्यात आली.
याशिवाय, वाहनचालकांना योग्य पद्धतीने अधिकृत नंबर प्लेट बसविण्याच्या सूचना देण्यात आल्या. आवश्यक दुरुस्ती केल्यानंतर संबंधित वाहने सोडण्यात आली.
बेळगाव पोलिसांनी स्पष्ट केले आहे की, दोषपूर्ण किंवा नंबर प्लेट नसलेल्या वाहनांविरोधातील ही मोहीम पुढील काळातही सातत्याने सुरू राहणार असून मोटार वाहन कायद्यानुसार कठोर कारवाई केली जाईल. सर्व वाहनधारकांनी वाहतूक नियमांचे काटेकोर पालन करून अधिकृत नंबर प्लेटचा वापर करावा, असे आवाहन करण्यात आले आहे.
