बेळगाव शहराला हादरवून सोडणाऱ्या तब्बल ४,५०० कोटी रुपयांच्या ठेवधारक फसवणूक प्रकरणाचा तपास आता निर्णायक वळणावर पोहोचला आहे. या प्रकरणात सीआयडीच्या तपासातून अनेक धक्कादायक माहिती समोर येत असून, आता या तपासाची व्याप्ती सामाजिक आणि राजकीय क्षेत्रापर्यंत पोहोचल्याचे दिसून येत आहे.
या प्रकरणातील मुख्य आरोपी शिवानंद नीलण्णावर याच्याकडून आलिशान मर्सिडीज बेंझ कार भेट म्हणून स्वीकारल्याच्या आरोपावरून ‘कर्नाटक रक्षण वेदिके’ (प्रवीण शेट्टी गट) चे जिल्हाध्यक्ष आणि अभिनेते आर. अभिलाष यांना सीआयडीने चौकशीसाठी नोटीस बजावली होती. त्यानुसार मंगळवारी ते माळमारुती पोलीस ठाण्यात हजर झाले.
सीआयडी सूत्रांकडून मिळालेल्या माहितीनुसार, ‘बेळगाव उत्सव’ कार्यक्रमानंतर अभिलाष यांना सुमारे १७ लाख रुपये किंमतीची सेकंड हँड मर्सिडीज बेंझ कार भेट देण्यात आली होती. ही रक्कम कथित फसवणुकीतून जमा झालेल्या पैशातून खर्च करण्यात आल्याचा संशय तपास यंत्रणेला आहे.
या कारच्या खरेदीची प्रक्रिया, मालकी हक्क, आर्थिक व्यवहार आणि संबंधित कागदपत्रांची पडताळणी करण्यासाठी सीआयडीच्या अधिकाऱ्यांनी अभिलाष यांची अनेक तास चौकशी केल्याची माहिती समोर आली आहे. चौकशीदरम्यान वाहनाचे मूळ दस्तऐवजही अधिकाऱ्यांनी तपासले.
दरम्यान, या बहुचर्चित घोटाळ्यातील इतर दुवेही उलगडत असून, मुख्य आरोपी शिवानंद नीलण्णावर याची पत्नी तसेच त्याचा व्यावसायिक भागीदार सुभाष यांनाही सीआयडीने नोटिसा पाठवून चौकशी केली आहे.
तपास यंत्रणेकडून मोठ्या प्रमाणात पुरावे गोळा करण्यात आल्याचे सांगितले जात असून, या प्रकरणात आणखी काही मोठी नावे समोर येण्याची शक्यता वर्तवली जात आहे. मुख्य आरोपी शिवानंद नीलण्णावर याला बुधवारी न्यायालयात हजर करण्यात येणार असल्याची माहिती सूत्रांनी दिली आहे.
या संपूर्ण कारवाईमुळे बेळगावच्या राजकीय, सामाजिक आणि व्यावसायिक वर्तुळात मोठी खळबळ उडाली असून, पुढील काही दिवसांत तपासात आणखी मोठे खुलासे होण्याची शक्यता व्यक्त केली जात आहे.
