बेळगावजवळील हिंडलगा मध्यवर्ती कारागृहात सुरक्षा व्यवस्थेबाबत पुन्हा एकदा गंभीर प्रश्न उपस्थित झाला आहे. गुरुवारी मध्यरात्रीच्या सुमारास कारागृहातील तपासणीदरम्यान आणखी एक मोबाईल फोन जप्त करण्यात आला.
कारागृह प्रशासनाने दिलेल्या माहितीनुसार, नियमित पाहणीदरम्यान डिटेन्यू विभागात अधिकाऱ्यांना एक किपॅड मोबाईल आढळून आला. हा मोबाईल नेमका कोणाकडे होता, याचा अद्याप उलगडा झालेला नाही.
या घटनेनंतर कारागृह अधिकाऱ्यांनी अज्ञात व्यक्तीविरोधात ग्रामीण पोलीस ठाण्यात गुन्हा नोंदवला आहे. विशेष म्हणजे, मागील काही महिन्यांपासून कारागृह परिसरात मोबाईल तसेच अन्य आक्षेपार्ह वस्तू सापडण्याच्या घटना सातत्याने समोर येत आहेत.
या पार्श्वभूमीवर कारागृहातील सुरक्षा व्यवस्थेची काटेकोर अंमलबजावणी आणि तपासणी यंत्रणा अधिक मजबूत करण्याची गरज पुन्हा अधोरेखित झाली आहे.
