बेळगाव / प्रतिनिधी
बेळगाव महानगरपालिकेत पुन्हा एकदा सत्ताधारी पक्षाच्या नगरसेवकांचा रोष उसळला आहे. महसूल उपायुक्त रेश्मा तालिकोटी यांच्या बदलीसंदर्भात सभेत ठराव मंजूर होऊनही त्यावर कोणतीही कार्यवाही न झाल्यामुळे संतप्त नगरसेवकांनी आज (सोमवारी) मनपा मुख्यालयात ठिय्या आंदोलन छेडले.
महसूल विभागात अनियमितता आणि गैरव्यवहार होत असल्याचा आरोप करत नगरसेवकांनी ‘भ्रष्ट अधिकाऱ्यांना पाठबळ देणे थांबवा’ अशी घोषणा दिली. निवडून आलेल्या सदस्यांच्या मतांना आणि अधिकारांना प्रशासन किंमत देत नाही, असा आरोप त्यांनी यावेळी केला.
महानगरपालिकेच्या सभेत रेश्मा तालिकोटी यांच्या बदलीचा ठराव बहुमताने मंजूर करण्यात आला होता. मात्र, अनेक तक्रारी असूनही अद्याप त्या पदावर कायम असल्याने संताप वाढला आहे. परिणामी, सत्ताधारी नगरसेवकांनी थेट मनपा आवारातच धरणे आंदोलन केले.
यावेळी सत्ताधारी पक्षाचे नेते हनुमंत कोंगाळी यांनी आंदोलकांना संबोधित करत सांगितले, “महसूल उपायुक्तांच्या भ्रष्ट कारभाराला प्रशासनाने छत्रछाया दिली आहे. आम्ही मुख्यमंत्री सिद्धरामय्या यांची भेट घेऊन या प्रकरणाची सविस्तर माहिती देणार आहोत. आवश्यक असल्यास सामूहिक राजीनाम्याचाही पर्याय आम्ही विचारात घेत आहोत.”
नगरसेवकांनी बेळगाव मनपेला सक्षम आणि प्रामाणिक अधिकारी द्यावेत, तसेच भ्रष्टाचारात गुंतलेल्या अधिकाऱ्यांना तत्काळ सेवामुक्त करावे, अशी मागणी केली.
या आंदोलनात सत्ताधारी पक्षाचे अनेक नगरसेवक उपस्थित राहून आपल्या मागण्यांसाठी ठाम भूमिका घेतली.
