बेळगाव : आयपीएल क्रिकेट सामन्यांदरम्यान सुरू असलेल्या ऑनलाईन बेटिंगविरोधात मार्केट पोलिसांनी आणखी एक मोठी कारवाई करत सहा जणांविरोधात गुन्हा नोंदवला आहे. जेल ग्राउंडजवळील मराठी शाळा परिसरात सुरू असलेल्या बेटिंग व्यवहाराची माहिती मिळाल्यानंतर पोलिसांनी छापा टाकला.
या कारवाईत आजाद नगर येथील सुफियान शेख हा मोबाईलच्या माध्यमातून आयपीएल सामन्यांवर पैशांची ऑनलाईन बेटिंग करत असल्याचे उघड झाले. तपासादरम्यान त्याच्यासोबत अमननगर, शहापूर आणि खंजर गल्ली परिसरातील काही युवकही या व्यवहारात सहभागी असल्याचे समोर आले.
मार्केट पोलीस ठाण्याचे उपनिरीक्षक विठ्ठल हावण्णावर आणि त्यांच्या पथकाने कारवाई करत संशयिताला ताब्यात घेतले. पोलिसांनी घटनास्थळावरून बेटिंगसाठी वापरण्यात आलेला मोबाईल फोन तसेच ५ हजार ६०० रुपयांची रोख रक्कम जप्त केली. जप्त मुद्देमालाची एकूण किंमत सुमारे १० हजार ६०० रुपये असल्याचे सांगण्यात आले.
या प्रकरणी संबंधित सहा जणांविरोधात मार्केट पोलीस ठाण्यात गुन्हा दाखल करण्यात आला असून पुढील तपास सुरू आहे
