बेळगाव : जिल्ह्यातील तसेच बेळगाव-चिक्कोडी शिक्षण जिल्ह्यातील निवृत्त शिक्षक आणि शिक्षिकांच्या निवृत्तीनंतर उद्भवणाऱ्या विविध प्रशासकीय अडचणींच्या निराकरणासाठी शिक्षण विभागाकडून सकारात्मक प्रतिसाद देण्यात आला आहे.
कर्नाटक राज्य सरकारी निवृत्त कर्मचारी संघाच्या बेळगाव जिल्हा शाखेच्या पदाधिकाऱ्यांनी ७ ऑगस्ट २०२६ रोजी सार्वजनिक शिक्षण विभागाच्या उपसंचालक श्रीमती लीलावती हिरेमठ यांची त्यांच्या कार्यालयात भेट घेऊन निवृत्त शिक्षकांच्या विविध प्रश्नांवर चर्चा केली. यावेळी संघाचे जिल्हाध्यक्ष एस. जी. सिद्दमाळ यांच्यासह अखिल भारतीय ज्येष्ठ नागरिक संघाचे राष्ट्रीय उपाध्यक्ष महांतेश हिरेमठ, बी. डी. केंचराहुत, संजीव बडिगेर आणि एम. एफ. अगसर उपस्थित होते.
निवृत्तीनंतर शिक्षक किंवा शिक्षिकांना कोणत्याही टप्प्यावर सेवाविषयक अथवा निवृत्तीशी संबंधित अडचण निर्माण झाल्यास त्या समस्येकडे गांभीर्याने लक्ष देऊन शक्य तितक्या लवकर तोडगा काढण्यासाठी प्रयत्न केले जातील, असे उपसंचालक लीलावती हिरेमठ यांनी स्पष्ट केले. शिक्षण विभागाशी संबंधित इतर प्रश्नांवरही आवश्यक ती कार्यवाही करण्याचे आश्वासन त्यांनी दिले.
दरम्यान, निवृत्त शिक्षकांनी आपल्या अडचणी सोडवण्यासाठी कोणत्याही मध्यस्थावर अवलंबून राहू नये, तसेच खोटी आश्वासने देणाऱ्या व्यक्तींच्या भूलथापांना बळी पडू नये, असे आवाहन संघाने केले आहे. समस्या थेट संघाच्या जिल्हा शाखेकडे लेखी स्वरूपात मांडण्याचे आवाहन करण्यात आले आहे.
निवृत्त शिक्षकांच्या प्रश्नांना संघटित पद्धतीने प्रशासनापर्यंत पोहोचवून त्यावर योग्य तो पाठपुरावा करण्याचा संघाचा प्रयत्न राहणार असल्याचेही यावेळी स्पष्ट करण्यात आले.
