बेळगावातील गोंधळी गल्ली परिसरातील स्कायवर्ड एव्हिएशन अकॅडमीमध्ये प्रशिक्षण पूर्ण करून आंतरराष्ट्रीय विमानतळावर निवड झालेल्या विद्यार्थ्यांच्या गौरवासाठी विशेष सत्कार समारंभाचे आयोजन करण्यात आले होते. या कार्यक्रमात बंगळुरू आंतरराष्ट्रीय विमानतळावर ग्राउंड हँडलिंग विभागात निवड झालेल्या विद्यार्थिनी नागवेणी पाशेट्टी हिचा विशेष सन्मान करण्यात आला.
या कार्यक्रमाला सामाजिक कार्यकर्ते मल्लेश चौगुले प्रमुख पाहुणे म्हणून उपस्थित होते. तसेच अकॅडमीचे प्रमुख विनोद बामणे, सरस्वती इन्फोटेकच्या ज्योती बामणे, अश्विनी मैत्री, राघवेंद्र मैत्री आणि वेद मैत्री यांचीही उपस्थिती होती.
कार्यक्रमादरम्यान बोलताना मल्लेश चौगुले यांनी स्कायवर्ड अकॅडमीच्या कार्याचे कौतुक केले. त्यांनी सांगितले की, विनोद बामणे यांच्या मार्गदर्शनाखाली हजारो विद्यार्थ्यांना रोजगाराच्या संधी उपलब्ध झाल्या आहेत. ग्रामीण व मराठी, कन्नड माध्यमातील विद्यार्थी येथे येऊन व्यावसायिक प्रशिक्षण घेतात आणि त्यानंतर विविध क्षेत्रांत यशस्वीरीत्या कार्यरत होतात.
ते पुढे म्हणाले की, जसे नर्सिंग शिक्षणानंतर रोजगाराची हमी असते, त्याचप्रमाणे स्कायवर्ड एव्हिएशन अकॅडमीमध्ये प्रशिक्षण पूर्ण करणाऱ्या विद्यार्थ्यांनाही रोजगाराच्या उत्तम संधी उपलब्ध करून दिल्या जातात.
अकॅडमीचे प्रमुख विनोद बामणे यांनीही विद्यार्थ्यांना करिअर मार्गदर्शन करताना एव्हिएशन क्षेत्रातील वाढत्या संधींबाबत माहिती दिली. कार्यक्रमात विद्यार्थ्यांचा उत्साह आणि पालकांचा विश्वास पाहायला मिळाला.
