बेळगाव
बहुकोटी रुपयांच्या आर्थिक गैरव्यवहाराच्या आरोपांमुळे चर्चेत आलेल्या शिवम असोसिएट्स प्रकरणाची चौकशी आता अधिकृतरीत्या सीआयडीकडे सोपविण्यात आल्याची माहिती जिल्ह्याचे पालकमंत्री तथा सार्वजनिक बांधकाम मंत्री Satish Jarkiholi यांनी दिली.
माध्यमांशी संवाद साधताना त्यांनी सांगितले की, सीआयडी अधिकारी सखोल तपास करून अहवाल सादर करतील आणि त्यानंतरच या प्रकरणातील संपूर्ण सत्यस्थिती स्पष्ट होईल. त्यामुळे चौकशी पूर्ण होईपर्यंत विविध अफवांवर विश्वास ठेवू नये, असेही त्यांनी सूचित केले.
मंत्री जारकीहोळी यांनी या घोटाळ्याचा राजकारणाशी कोणताही संबंध नसल्याचे स्पष्ट करत, हा मुद्दा पूर्णपणे आर्थिक फसवणुकीशी निगडित असल्याचे सांगितले. अनधिकृत पद्धतीने पैसा उभारून नागरिकांची दिशाभूल करण्यात आल्याच्या आरोपांवरून पोलिसांनी कारवाई केली असल्याचे त्यांनी नमूद केले.
यावेळी त्यांनी नागरिकांना आर्थिक गुंतवणुकीबाबत सावध राहण्याचे आवाहन केले. जादा व्याज किंवा आकर्षक परताव्याच्या आमिषाला बळी पडून अनधिकृत संस्थांमध्ये पैसे गुंतवू नयेत, असे सांगत जनजागृतीची गरजही त्यांनी अधोरेखित केली.
दरम्यान, आयपीएस अधिकारी संदीप पाटील यांची बेळगाव उत्तर विभागाचे नवे पोलीस महानिरीक्षक म्हणून नियुक्ती करण्यात आली असून ते लवकरच पदभार स्वीकारतील, अशी माहितीही त्यांनी दिली.
पेट्रोल, डिझेल आणि गॅस दरवाढीच्या मुद्द्यावर बोलताना जारकीहोळी यांनी केंद्र सरकारवर टीका केली. निवडणुका संपल्यानंतर इंधन व जीवनावश्यक वस्तूंच्या किंमती वाढविण्याची पद्धत नवी नसल्याचा आरोप त्यांनी केला. वाढत्या महागाईमुळे सामान्य नागरिकांचे आर्थिक गणित कोलमडत असल्याचेही त्यांनी म्हटले.
