बेंगळुरू
कर्नाटकाच्या राजकारणात मोठी घडामोड घडण्याचे संकेत मिळत असून मुख्यमंत्री सिद्दरामय्या यांनी मुख्यमंत्री पद सोडण्याबाबत महत्त्वपूर्ण वक्तव्य केल्याने राजकीय वर्तुळात चर्चांना उधाण आले आहे.
काँग्रेस हायकमांडच्या सूचनेनुसार मुख्यमंत्री सिद्दरामय्या यांनी उपमुख्यमंत्री डी.के. शिवकुमार आणि मंत्रिमंडळातील सहकाऱ्यांसोबत सरकारी निवास ‘कावेरी’ येथे उपहार बैठक घेतली. या बैठकीत सिद्दरामय्या यांनी “मला कोणतीही खंत नाही, मी मनापासून राजीनामा देत आहे,” असे वक्तव्य केल्याची माहिती समोर आली आहे.
दिल्लीमध्ये नुकत्याच झालेल्या काँग्रेस हायकमांड बैठकीत नेतृत्व बदलासंदर्भात चर्चा झाली होती. सूत्रांच्या माहितीनुसार, राहुल गांधी यांच्या सूचनेनंतर सिद्दरामय्या यांनी सत्तांतरास सहमती दर्शवली असल्याचे बोलले जात आहे.
बैठकीत सत्तेचे सुरळीत हस्तांतरण, पक्षातील एकजूट आणि पुढील नेतृत्वाबाबत चर्चा झाल्याची माहिती आहे. मात्र पुढील मुख्यमंत्री कोण असणार याबाबत सिद्दरामय्या यांनी स्पष्ट नाव घेतले नाही. “हायकमांडच अंतिम निर्णय घेईल,” असे ते म्हणाले.
या बैठकीदरम्यान डीके शिवकुमार भावूक झाल्याची चर्चा असून सिद्दरामय्या यांनी दिलेला शब्द पाळल्यामुळे त्यांनी भावना व्यक्त केल्याचे सूत्रांचे म्हणणे आहे.
या घडामोडींमुळे कर्नाटक काँग्रेसमध्ये नेतृत्व बदल जवळपास निश्चित मानला जात असून पुढील काही दिवसांत मोठी राजकीय घोषणा होण्याची शक्यता वर्तवली जात आहे.
