बेळगाव : राष्ट्रीय स्तरावरील विविध जूडो स्पर्धांमध्ये बेळगाव येथील क्रीडा वसतिगृहातील खेळाडूंनी उल्लेखनीय कामगिरी करत राज्याचा झेंडा उंचावला आहे. जानेवारी 2026 महिन्यात देशातील विविध शहरांत झालेल्या स्पर्धांमध्ये येथील खेळाडूंनी पदकांची कमाई करत आपली गुणवत्ता सिद्ध केली.
पंजाबमध्ये कास्यपदकांची कमाई
५ ते ११ जानेवारी २०२६ दरम्यान पंजाब येथे पार पडलेल्या १४ वर्षांखालील शालेय राष्ट्रीय जूडो स्पर्धेत कावेरी सूर्यवंशी आणि श्लोक कातकर यांनी कास्यपदक पटकावत बेळगावचे नाव उज्ज्वल केले.
कोलकात्यात ज्युनियर राष्ट्रीय स्पर्धेत यश
२३ ते २६ जानेवारी २०२६ दरम्यान कोलकाता येथे झालेल्या ज्युनियर नॅशनल जूडो स्पर्धेत सायिश्वरी कोडचवाडकर हिने कास्यपदक जिंकत उल्लेखनीय कामगिरी बजावली.
मणिपूरमध्ये रौप्यपदक
२२ ते २८ जानेवारी २०२६ या कालावधीत मणिपूर येथे आयोजित १७ वर्षांखालील शालेय राष्ट्रीय जूडो स्पर्धेत अंजली पाटील हिने रौप्यपदक पटकावले.
दिल्लीतील १९ वर्षांखालील स्पर्धेत पदकांची लयलूट
२९ जानेवारी ते ४ फेब्रुवारी २०२६ दरम्यान दिल्ली येथे झालेल्या १९ वर्षांखालील शालेय राष्ट्रीय जूडो स्पर्धेत स्पंदना के. वाय., श्वेता अलकनूर, सोनालिका सी. एस., संगमेश मदली, धनुष एल. आणि आर्यन डोंगले यांनी कास्यपदक मिळवत संघाची ताकद सिद्ध केली.
या सर्व यशस्वी खेळाडूंना युवक सक्षमीकरण व क्रीडा विभागाचे उपसंचालक बी. श्रीनिवास, प्रशिक्षक रोहिणी पाटील व कुतुजा मुल्तानी तसेच विभागातील कर्मचाऱ्यांनी अभिनंदन व शुभेच्छा दिल्या.
बेळगाव क्रीडा वसतिगृहातील खेळाडूंच्या सातत्यपूर्ण यशामुळे जिल्ह्यातील क्रीडा क्षेत्राला नवी उभारी मिळत असल्याचे मत क्रीडावर्तुळात व्यक्त होत आहे.
