राष्ट्रीय जूडोमध्ये वैष्णवी भडांगेची चमक; बेंगलोर येथे गौरवपूर्ण सत्कार
बेळगाव | क्रीडा प्रतिनिधी
केरळ येथे पार पडलेल्या अस्मिता खेलो इंडिया वुमन्स राष्ट्रीय जूडो स्पर्धेत 52 किलो वजनी गटात ब्रांझ पदक जिंकणाऱ्या बेळगावच्या कुमारी वैष्णवी भडांगे हिचा बेंगलोर येथे क्रीडा संघटनेच्या वतीने सन्मान करण्यात आला. यासोबतच चेन्नई येथे झालेल्या राज्यस्तरीय जूडो स्पर्धेत प्रथम क्रमांक पटकावून तिने आपल्या गुणवत्तेची ठळक छाप उमटवली आहे.
वैष्णवी ही मराठा मंडळ जिजामाता हायस्कूलची विद्यार्थिनी असून, तिच्या या उल्लेखनीय कामगिरीबद्दल बेंगलोर येथे आयोजित कार्यक्रमात तिचा गौरव करण्यात आला. तसेच मराठा मंडळ जिजामाता हायस्कूलमध्येही विशेष सत्कार सोहळा पार पडला.
या कार्यक्रमास बेळगाव जिल्हा शिक्षण अधिकारी श्रीमती लिलावती हिरेमठ, डाएटचे प्राचार्य श्री. सिंदगी, बेळगाव शहर क्षेत्रशिक्षण अधिकारी श्री. रवी बजंत्री यांच्यासह इतर शिक्षण अधिकाऱ्यांची उपस्थिती होती. सर्व मान्यवरांनी वैष्णवीचे कौतुक करत तिच्या पुढील वाटचालीस शुभेच्छा दिल्या.
विशेष बाब म्हणजे, मणिपूर येथे होणाऱ्या आगामी राष्ट्रीय जूडो स्पर्धेसाठी वैष्णवीची निवड झाली असून, तिच्या क्रीडा कारकिर्दीतील हा महत्त्वाचा टप्पा मानला जात आहे.
तिच्या यशामागे मराठा मंडळच्या अध्यक्षा डॉ. राजश्रीताई नागराजु हलगेकर, मुख्याध्यापक श्री. एन. डी. पाटील, शारीरिक शिक्षिका अश्विनी पेटकर तसेच इतर शिक्षकांचे मार्गदर्शन आणि प्रोत्साहन लाभले. वैष्णवीच्या या घवघवीत यशाबद्दल सर्व स्तरांतून अभिनंदनाचा वर्षाव होत आहे.
