बेळगाव:
येळळूर- वडगाव मेन रस्त्यावर कचऱ्याचे साम्राज्य निर्माण झाले आहे. या रस्त्याच्या कडेला कचऱ्याचे ढीग पडलेले दिसून येत आहेत. या कचऱ्याची वेळेवर उचल होत नसल्यामुळे दुर्गंधी सुटली आहे. त्यामुळे नागरिकांच्या आरोग्याला धोका निर्माण झाला आहे.
या परिसरामध्ये केएलइ हॉस्पिटल त्याचबरोबर नागरी वसाहती देखील आहेत. त्यामुळे या कचऱ्याचा येथील नागरिकांना त्याचप्रमाणे हॉस्पिटलला येणाऱ्या नागरिकांना देखील त्रास होत आहे. या भागामध्ये बेवारस कुत्र्यांचा वावर देखील मोठ्या प्रमाणावर आहे. ही कुत्री हा कचरा ओढून रस्त्यावर आणून टाकत आहेत. या कुत्र्यांना हटकल्यानंतर ती संबंधित व्यक्तींच्या अंगावर धावून येत आहेत. त्यामुळे नागरिकांच्या आरोग्याबरोबरच नागरिकांच्या जीवाला देखील धोका निर्माण झाला आहे. तेव्हा येथे कचरा टाकणाऱ्यांवर योग्य कारवाई करण्यात यावी, अशी मागणी नागरिकांनी केली आहे.
वडगाव येथील अष्टविनायक नगर येथील मुख्य रस्त्याच्या बाजूला असलेल्या वीज पुरवठा करणाऱ्या खांबाखाली काही नागरिकांकडून कचरा टाकण्यात येत होता. त्यामुळे येथे देखील दुर्गंधी सुटली होती. त्याचा येथील नागरिकांना त्रास सहन करावा लागत होता. त्यामुळे या भागातील नागरिकांनी या परिसरातील स्वच्छता करून येथे कचरा टाकणाऱ्यांवर पाचशे रुपये दंडाची कारवाई करण्यात येईल असा फलक देखील लावला आहे. येथे कचरा टाकणाऱ्यांवर सीसीटीव्ही कॅमेऱ्याची नजर राहणार आहे.
https://youtube.com/shorts/5YgZm8AYbbE?si=1ZLeA1dTQsDHwrGu
येथील कचऱ्याबाबत नागरिकांकडून तसेच प्रसारमाध्यमांकडून वेळोवेळी आवाज उठवण्यात आलेला आहे. मात्र याबाबत संबंधित खात्याकडून म्हणावी तशी कारवाई करण्यात आलेली नाही.
