हैदराबाद : पश्चिम आशियातील वाढत्या तणावामुळे जागतिक अर्थव्यवस्थेवर परिणाम होत असताना पंतप्रधान नरेंद्र मोदी यांनी देशवासीयांना इंधनाचा काटकसरीने वापर करण्याचे आवाहन केले. तेलंगणातील विविध विकास प्रकल्पांच्या कार्यक्रमात बोलताना त्यांनी पेट्रोल, डिझेल आणि गॅसच्या वाढत्या आयातीचा मुद्दा उपस्थित केला.
देशाला आवश्यक असलेले बहुतांश इंधन आयात करावे लागते. त्यामुळे परकीय चलनावर मोठा ताण येत असल्याचे सांगत मोदी यांनी नागरिकांनी शक्य तितका इंधन वापर कमी करावा, असे म्हटले. यावेळी त्यांनी कोरोना काळातील ‘वर्क फ्रॉम होम’, ऑनलाइन बैठका आणि व्हिडिओ कॉन्फरन्सिंगचा उल्लेख केल्याने सोशल मीडियावर विविध चर्चांना उधाण आले.
मोदी यांनी खासगी वाहनांचा वापर मर्यादित ठेवण्याचा सल्ला देत, मेट्रो सेवा उपलब्ध असलेल्या शहरांमध्ये सार्वजनिक वाहतुकीला प्राधान्य द्यावे असे सांगितले. कारपूलिंगचा वापर वाढवण्याबरोबरच इलेक्ट्रिक वाहनांचा अधिकाधिक वापर करण्याचेही त्यांनी आवाहन केले.
त्याचबरोबर परकीय चलनाची बचत करण्यासाठी नागरिकांनी अनावश्यक परदेश प्रवास टाळावा, सुट्ट्यांसाठी देशांतर्गत पर्यटनाला प्राधान्य द्यावे आणि पुढील काही काळ सोन्याची खरेदी टाळण्याचाही सल्ला त्यांनी दिला. सोन्याच्या आयातीमुळे देशातून मोठ्या प्रमाणावर परकीय चलन बाहेर जात असल्याचे त्यांनी स्पष्ट केले.
इराण युद्धाच्या पार्श्वभूमीवर केंद्र सरकार परिस्थितीवर बारकाईने लक्ष ठेवून असल्याचे मोदी यांच्या वक्तव्यातून दिसून आले. इंधन दरवाढ आणि संभाव्य आर्थिक परिणामांमुळे नागरिकांमध्ये चिंतेचे वातावरण निर्माण झाले आहे.
